Makkergaranti

♣️ Klepp bridgeklubb relanserer makkergaranti! ♣️

Har du lyst å spela bridge, men manglar makker? No relanserer Klepp bridgeklubb makkergarantiordninga – og me håpar mange vil vere med!

🕕 Slik fungerer det:

Oppmøte og registrering i turneringsleiaren sitt hjørne seinast kl. 18:00

→ Kven du kan/ikkje kan spele med, samt dine ønskjer før trekninga av makker

Trekning / tildeling av makker skjer kort tid etter

De får då 10–15 minutt til å avtala system

✅ Viktige spelereglar for ordninga

Ikkje dann par på eiga hand etter at de er registrert hjå turneringsleiaren, då blir det rot!

Du kan ikkje nekta å spela med makkeren du får

→ Gje beskjed til turneringsleiar i forkant av tildelinga om det er nokon du ikkje kjem til å klare spela med, me har full forståing for at ikkje alle matchar med alle

Tydeleg misnøye/skuffelse over å få ein annan makker enn du håpte på, blir ikkje akseptert

Du skal behandla makkeren din med respekt

Ver hyggeleg – både i ord og kroppsspråk

Brot på desse reglane kan føra til at du blir utestengd frå makkergarantiordninga

🌱 Kven passar ordninga for?

Både ferske, proffe, rustne og midt-på-treet-spelarar er velkomne – møt opp aleine, så ordnar me makker til deg

Er du ein som har stort nettverk og har lett for å ordna deg makker?

👉 Du er hjartans velkomen til å nytta ordninga då òg, om du vil

Me ønskjer gjerne ein kultur der det er heilt normalt – ja, gjerne litt kult og vågalt – å koma til Klepp utan makker.

Makkergaranti skal ikkje sjåast på som ei nødløysing, men som ein naturleg og positiv del av klubbmiljøet ♣️

🔀 Trekning og preferansar

Blir det mange spelarar som deltek i ordninga, kan me til dømes:

• tildela makker etter handikap (høgt/lågt saman)

• trekkja heilt tilfeldig

• leggja andre preferansar eller kriterium til grunn

Dette avklarar me frå gong til gong etter ønskje frå deltakarane.

♣️ Makkergarantisten

Underteikna er makkergarantist inntil vidare. Om andre har lyst til å stilla som garantist éin eller fleire kveldar, er det hjartanst velkoment – gje beskjed til underteikna.

Ordninga gjeld inntil vidare, så lenge det er spelarar som vel å nytta seg av ordninga, og så lenge vi har frivillig garantist. Me prøver oss fram – vegen blir til medan me går.

Vel møtt ved bridgebordet!